Salm 34

Diolch i'r ARGLWYDD am ei ofal

¹ Dw i am ganmol yr ARGLWYDD bob amser;

a'i foli'n ddi-baid!

² Dw i am frolio'r ARGLWYDD!

Bydd y rhai sy'n cael eu cam-drin

yn clywed ac yn llawenhau!

³ Dewch i ganmol yr ARGLWYDD gyda mi!

Gadewch i ni ei foli gyda'n gilydd!

⁴ Ro'n i wedi troi at yr ARGLWYDD am help,

ac atebodd fi.

Achubodd fi o'm holl ofnau.

⁵ Mae'r rhai sy'n troi ato yn wên i gyd;

does dim mymryn o gywilydd ar eu hwynebau.

⁶ Dyma i chi ddyn anghenus wnaeth alw arno,

a dyma'r ARGLWYDD yn gwrando

ac yn ei achub o'i holl drafferthion.

⁷ Mae angel yr ARGLWYDD fel byddin

yn amddiffyn ^Ref y rhai sy'n ei ddilyn yn ffyddlon,

ac mae'n eu hachub nhw.

⁸ Profwch drosoch eich hunain mor dda ydy'r ARGLWYDD!

Mae'r rhai sy'n troi ato am loches wedi eu bendithio'n fawr!

⁹ Arhoswch yn ffyddlon i'r ARGLWYDD, chi sydd wedi eich dewis ganddo,

mae gan y rhai sy'n ffyddlon iddo bopeth sydd arnyn nhw ei angen!

¹⁰ Mae llewod ifanc yn gallu bod heb fwyd ac yn llwgu weithiau,

ond fydd dim angen ar y rhai hynny sy'n troi at yr ARGLWYDD am help.

¹¹ Dewch, blant, gwrandwch arna i.

Dysga i chi beth mae parchu'r ARGLWYDD yn ei olygu.

¹² Ydych chi eisiau mwynhau bywyd?

Ydych chi eisiau byw yn hir a bod yn llwyddiannus?

¹³ Rhaid i chi reoli'ch tafod a stopio twyllo!

¹⁴ Troi cefn ar ddrwg a gwneud beth sy'n dda;

a gwneud eich gorau i gael perthynas dda gyda phawb.

¹⁵ Mae'r ARGLWYDD yn gofalu am y rhai sy'n gwneud beth sy'n iawn,

ac yn gwrando'n astud pan maen nhw'n galw arno.

¹⁶ Ond mae e yn erbyn y rhai sy'n gwneud drygioni —

bydd yn cael gwared â phob atgof ohonyn nhw o'r ddaear.

¹⁷ Pan mae'r rhai sy'n byw'n iawn yn gweiddi am help,

mae'r ARGLWYDD yn gwrando,

ac yn eu hachub nhw o'u holl drafferthion.

¹⁸ Mae'r ARGLWYDD yn agos at y rhai sydd wedi torri eu calonnau.

Mae e'n achub y rhai sydd wedi anobeithio.

¹⁹ Mae'r rhai sy'n byw yn iawn yn wynebu pob math o helyntion,

ond bydd yr ARGLWYDD yn eu hachub nhw drwy'r cwbl!

²⁰ Mae'n amddiffyn eu hesgyrn,

fydd dim un yn cael ei dorri!

²¹ Mae pobl ddrwg yn cael eu dinistrio gan eu drygioni eu hunain.

Bydd y rhai sy'n casáu pobl dduwiol yn cael eu cosbi.

²² Ond mae'r rhai sy'n gwasanaethu'r ARGLWYDD

yn cael mynd yn rhydd!

Fydd y rhai sy'n troi ato fe am loches ddim yn cael eu cosbi!

I'r pen