SECHAREIA 9

Duw yn barnu a bendithio cymdogion Israel

¹ Y neges roddodd yr ARGLWYDD

am ardal Chadrach,

yn arbennig tref Damascus.

(Mae llygad yr ARGLWYDD ar y ddynoliaeth

fel mae ar lwythau Israel i gyd.)

² Ac am Chamath, sy'n ffinio gyda Damascus,

a Tyrus a Sidon ^Ref hefyd,

sy'n meddwl ei bod mor glyfar.

³ Mae Tyrus wedi gwneud ei hun mor gryf

ac mor gyfoethog^Croes – mae wedi pentyrru

arian fel pridd, ac aur fel baw ar y strydoedd!

⁴ Ond bydd y Meistr yn cymryd y cwbl,

ac yn suddo ei llongau yn y môr.

Bydd tref Tyrus yn cael ei llosgi'n ulw!

⁵ Bydd Ashcelon yn gweld hyn ac yn dychryn.

Bydd Gasa yn gwingo mewn ofn;

ac Ecron hefyd wedi anobeithio'n llwyr.

Bydd brenin Gasa yn cael ei ladd,

a fydd neb ar ôl yn Ashcelon.

⁶ A bydd pobl o dras gymysg yn setlo yn Ashdod. ^Ref

Dw i'n mynd i dorri crib y Philistiaid!

⁷ Yna wnân nhw byth eto

fwyta dim gyda gwaed ynddo,^Croes

na chig wedi'i aberthu i eilun-dduwiau.

Bydd y rhai sydd ar ôl yn Philistia

yn dod i gredu yn ein Duw –

byddan nhw fel un o deuluoedd Jwda.

A bydd pobl Ecron fel y Jebwsiaid. ^Ref

⁸ Bydda i'n gwersylla o gwmpas y deml,

i'w hamddiffyn rhag y byddinoedd sy'n mynd a dod.

Fydd neb yn ymosod ar fy mhobl

i'w gormesu nhw byth eto.

Dw i fy hun yn gofalu amdanyn nhw.^Croes

Y brenin sydd i ddod

⁹ Dathlwch bobl Seion!

Gwaeddwch yn llawen, bobl Jerwsalem!

Edrych! Mae dy frenin yn dod.

Mae e'n gyfiawn ac yn achub;

Mae'n addfwyn ac yn marchogaeth ar asyn,

ie, ar ebol asen.

¹⁰ Bydda i'n symud y cerbydau rhyfel o Israel, ^Ref

a mynd â'r ceffylau rhyfel i ffwrdd o Jerwsalem.

Bydd arfau rhyfel yn cael eu dinistrio!

Yna bydd y brenin yn cyhoeddi heddwch i'r gwledydd.^Croes

Bydd yn teyrnasu o fôr i fôr,

ac o afon Ewffrates i ben draw'r byd!^Croes

¹¹ Yna chi, fy mhobl – oherwydd yr ymrwymiad

rhyngon ni, wedi'i selio â gwaed ^Ref –

dw i'n mynd i ryddhau eich carcharorion

o'r pydew oedd heb ddŵr ynddo.

¹² Dewch adre i'r gaer ddiogel,

chi garcharorion – mae gobaith!

Dw i'n cyhoeddi heddiw eich bod i gael

popeth gollwyd yn ôl – dwywaith cymaint!

¹³ Jwda ydy'r bwa dw i'n ei blygu,

ac Israel ^Ref ydy'r saeth.

Bydda i'n codi dy bobl di, Seion,

yn erbyn gwlad Groeg.

Bydd Seion fel cleddyf rhyfelwr

yn fy llaw.

¹⁴ Yna bydd yr ARGLWYDD i'w weld

uwchben ei bobl,

a'i saeth yn tanio fel mellten.

Bydd y Meistr, yr ARGLWYDD, yn chwythu'r corn hwrdd, ^Ref

ac yn ymosod fel gwynt stormus o'r de.

¹⁵ Bydd yr ARGLWYDD hollbwerus

yn amddiffyn ei bobl.

Byddan nhw'n concro'r gelyn gyda ffyn tafl,

ac yn gwledda a dathlu fel meddwon.

Bydd fel y gwaed o bowlen yr aberth

yn cael ei sblasio ar gyrn yr allor.

¹⁶ Bryd hynny, bydd yr ARGLWYDD eu Duw

yn eu hachub, am mai nhw ydy praidd ei bobl.

Byddan nhw'n disgleirio ar ei dir

fel cerrig gwerthfawr mewn coron –

¹⁷ Mor werthfawr! Mor hardd!

Bydd ŷd a sudd grawnwin yn gwneud

y dynion a'r merched ifanc yn gryf.

I'r pen